LOU PAURE QUE DEMANDO

Pèr En FREDERI BOHN

   En tre que l’Aubo di det rousen, matiniero, pareiguè, Telemaque, lou fiéu escari dóu divin Ulisse, courdelè de bèlli sandalo à si pèd, prenguè ‘no pico soulido, bèn à sa man, e lèst pèr parti, diguè au Pourcatié :

   — Paire, vau à la vilo, pèr que ma maire me vègue car crese pas que finigue de ploura ni de se descounsoula davans que m’ague revist. Te dise pièi eiçò : meno aquéu paure estrangié à la vilo pèr que ié demande soun viéure. Aquéu que voudra ié douna lou manja e lou béure lou fara. Aclapa coume siéu de malastre, pode pas assousta tóuti lis ome. S’aquel estrangié n’en pren malìcio, ié sara mai dur à passa ; mai iéu ame de parla franc.

   E l’avisa Ulisse ié venguè :

   — Ami, vole pas que me retèngon. Vau miés demanda soun viéure dins la vilo qu’i champ. Aquéu que voudra, dounara.Volepas mai demoura dins ti jas pèr óubeï en tóuti lis ordre d’un baile. Tu, parte ; e lou Pourcatié me menara coume dises, quand me sarai caufa à la regalido dóu fiò e que la calour me sara vengudo; car n’ai rèn mai qu’aquéli peiandro, e ai pòu que la fresquiero dóu matin me prèngue; dison que la vilo es liuencho.

   Ansi parlè. Telemaque sourtiguè de la cabano e marchè vitamen en pensant au chaple di Calignaire. Pièi, arriba au palais poupulous, apielè sa pico contro uno auto coulouno e intrè ‘n passant lou lindau de pèiro. Tant-lèu, la beilesso Euriclèio, qu’espandissié lis aus sus li fautuei bèn gaubeja, lou veguè prou miero. E venguè vers éu touto en plour. E lis àutri servicialo dóu paciènt Ulisse s’acampèron entour de Telemaque, e l’embrassavon, e beisavon sa tèsto e sis espalo. La prudènto Penelopo sourtiguè à la lèsto de sa chambro nouvialo, pariero d’Artemis o de la Vènus d’or. E, plourant, embrassè soun fiéu escari, e beisè sa tèsto e si bèus iue, e ié diguè ‘mé de geme aquéli paraulo aludo :

   — Siés dounc tourna, Telemaque, ma bello lus ! cresiéu plus de te revèire, despièi que siés parti sus d’uno nau pèr Pilos, à ma dessaupudo e contro iéu, pèr saupre de toun paire. Mai digo-me léu ço qu’as sachu.

   E lou prudènt Telemaque ié respoundeguè :

   — Ma maire, faguès pas eigreja mi lagremo, esmouvès pas moun cor dins lou pitre, iéu que vene d’escapa de la mort. Mai bagnas vous, cargas de raubo fresco e mountas emé li servicialo dins li chambro d’aut pèr faire vot en li diéu de bèllis ecatoumbo que ié counsacrarés, se Jupitèr me douno de prene moun revenge. Pèr iéu vau en Plaço, cerca ‘n oste que m’a segui à moun retour. L’ai manda davans emé li coumpan parié di diéu ; ai di à Piriéu de lou mena dins soun oustau, de lou souigna e de ié faire ounour jusquo que siegue de retour.

   Ansin parlè, e noun parlè de-bado. Penelopo se bagnè, prenguè de raubo fresco, mountè ‘mé si servicialo dins li chambro d’aut e faguè vot, en tóuti li diéu, de bèllis ecatoumbo que ié counsacrarié, se Jupitèr dounavo à Telemaque de prene soun revenge.

   Aquest, sourtiguè pièi de l’oustau, tenènt sa lanço. Dous chin courrènt lou seguissien. Minervo espargiguè sus d’éu uno gràci divino.Tout lou pople lou badavo quand passavo. E li Calignaire famous ié fasien coum-plimen, tóuti groupa à soun entour ; mai dins soun amo perpensavon sa rouino. Se tirè liuen d’éli, e s’anè asseta aqui mounte i’avié Mentor, Antife e Aliterso, vièis ami de soun paire. S’assetè, e aquésti ié demandavon de tout. Piriéu, famous pèr la lanço, venguè vers éli menant soun oste vers la Plaço, en vilo. Telemaque se virè tant-lèu de vers l’Estrangié; mai Piriéu diguè premié :

   — Telemaque, mando lèu li servicialo à l’oustau que te baie li douno de Menelau.

    E lou Prudènt Telemaque ié respoun-deguè :

   — Sabèn pas coume viraran lis afaire. Se li famous Calignaire me tuon à l’escoundudo dins l’oustau e se partisson mi bèn peirenau, vole qu’aquéli douno siechon tiéuno Se ié mande lou mau-destin e la mort, alor me lis adurras, countènt, dins moun oustau e me n’en gaudirai.

   Aguènt ansin parla, menè vers l’oustau soun oste malastra. E quand fuguèron rendu, quitèron si flassado sus li sèti e li fautuei, e se bagnèron dins de bagnadouiro liso. E quand lis aguèron fa bagna e voun d’òli redoulènt, li servicialo li vestiguèron de jargau e de flassado pelouso, e s’assetèron sus de fautuei. Uno servicialo ié vujè l’aigo d’uno eigadiero d’or dins un plat d’argènt pèr se lava li man. Pièi ié meteguè davans uno taulo neto ; e la venerablo beilesso, bèn-voulènto pèr tóuti, la carguè de pan qu’avié adu e de mèisse en abounde. Penelopo s’assetè contro éli, à la porto de la salo, e clinado sus soun sèti, fielavo la lano fino. Alounguèron li man vers li mèisse davans d’éli ; e quand se fuguèron leva la set emai la fam, la prudènto Penelopo diguè proumiero :

   — Telemaque, remountarai dins ma chambro nouvialo, e m’ajassarai sus lou lié devengu pèr iéu doulènt, de longo bagna de mi plour, despièi lou jour qu’Ulisse es ana vers Ilioun emé li Fiéu d’Atriéu ; e vos pas me dire ço qu’as sachu dóu retour de toun paire, avans que li famous Calignaire rintron dins l’oustau.

   E lou prudènt Telemaque ié venguè :

   — Ma maire, vous dirai la verita. Sian ana vers Pilos, encò dóu prince di pople, Nestor. Aquest m’a aculi dins soun grand palais e a agu siuen de iéu coume un paire de soun enfant que revèn de liuen. Ansin m’an aculi, tant éu que si fiéu. Mai m’afourtiguè que pa ‘n ome sus terro i’avié rèn di dóu malastra Ulisse, que fugue mort o viéu. E m’a manda em’ un càrri e de chivau vers Menelau l’Enfant d’Atriéu. Aqui ai vist l’Argiano Eleno, que pèr elo tant de Grè e tant de Trouian an soufri, à la voulounta di Diéu. E lou valènt Menelau m’a demanda perqué veniéu dins la divino Lacedemouno : i’ai di lou verai e m’a respoundu ‘nsin :   — Diéu ! de couard voudrien s’ajassa dins lou lié d’un valènt ome ! Coume uno cèrvio a leissa dins lou repaire d’un leioun caloussu si cervioun nouvèu e tetaire, dóu tems qu’elo vai pasturga sus lis auturo o dins li vau tepudo ; mai veici que lou leioun rintrant dins soun repaire esgorjo malamen tóuti li cervioun : ansin Ulisse ié fara subi la malo escoutelado. Plasigue à Jupitèr, em’ à Minervo, em’à-n-Apouloun, qu’Ulisse vèngue au mitan di Calignaire coume faguè, dins Lesbos bèn bastido, quand s’aubourè contro lou Filoumelèido pèr lou lucha, e que l’esterniguè ! Tóuti li Grè se n’en gaudiguèron. Bouto, la vido di Calignaire sarié courto e si noço sarien amaro. Mai ço que me demandes en me pregant, te lou dirai sènso rèn t’escoundre coume me l’a di lou Vièi de la Mar, noun messourguié. Te dirai tout e noun t’escoundrai rèn. M’a di qu’avié vist Ulisse reboulissènt de malo doulour dins l’isclo e li demoro di la Ninfo Calipsò que lou retèn de forço ; e pòu pas gagna la terro de la patrìo, car éu a n’a plus de barco armejado de rèm ni de coumpan que poscon lou ramena sus l’esquinasso de la mar. Es ansin que m’a parla Menelau, ilustre pèr la lanço. Pièi siéu parti, e lis Inmourtau m’an fa espira un vènt en favour, e m’an lèu ramena sus la terro de la Patrìo.

    Parlè ‘nsin, e Penelopo fuguè treboulado dins soun amo. E lou divin Tiéuclimèno ié venguè :

   — O digno mouié d’Ulisse, certo Telemaque saup pas tout. Escouto mi paraulo : te dirai la verita e noun t’escoundrai rèn. Que Jupitèr, lou premié d’entre li Diéu, lou sache ! e que lou sache aquelo taulo de l’oste, e que lou sache l’oustau dóu valènt Ulisse mounte siéu avengu ! Certo Ulisse es deja sus la terro de la patrìo. Escoundu o barrulaire, cerco de saupre li causo menèbro que se passon e perpenso la rouino di Calignaire. Acò ‘s dins lou signe qu’ai vist sus la barco à banc d’apès e qu’ai fa saupre à Telemaque.

   E la prudènto Penelopo ié respoundeguè :

   — I Diéu plasigue, Estrangié ! ti paraulo se coum-pliguèsson ! saupras lèu alor moun amistanço, e de iéu tendras de douno nombrouso, e cadun dis ome te dira bèn-astru.

   Ansin se parlavon. E dou tèms li Calignaire, davans lou palais d’Ulisse, sus lou bèu bardat ounte espaçavon d’abitudo sa croio, se gouspihavon de manda li palet e li flècho. Mai quand l’ouro de manja venguè, e que li fedo arribavon de tóuti li caire di champ em’ aquéli que li menavon toujour, alor Medoun, que i’agradavo lou mai de tóuti li precoun, e que manjavo à sa taulo, ié diguè :

   — Jouvènt, aro que vous sias gouspiha de jouga intras dins l’oustau qu’alestiguèn lou repas: car es jamai marrit de manja à soun ouro.

Ansin parlè, e tóuti s’aubourèron e rintrèron dins l’oustau. Uno fes dedins, quitèron si flassado sus li sèti e li fautuei. Pièi escoutelèron li bèlli fedo e li cabro grasso, e tambèn li porc gras em’ uno junego; e adoubèron lou repas.

   Dóu tèms, Ulisse emé lou brave pourcatié èron lèst pèr veni di champ à la vilo, e lou baile di pourcatié parlè proumié :

   — Parten, moun oste! abord que vos ana vuei à la vilo, coume l’a di lou mèstre. Certo, t’auriéu vougu leissa pèr garda li jas. Mai ai cregnènço dóu mèstre e ié fau ounour, e vole pas que me charpe, car li reproche di mèstre soun grèu. Fasen camin. Lou jour baisso e farié mai fres pèr tu sus lou vèspre.

   Alor l’avisa Ulisse ié respoundeguè :

   — Coumprés ; lou sabe; farai ço que me dise avisadamen. Anen, meno-me, e douno-me ‘n bastoun, pèr me regi, d’abord que dises lou camin soude.

   Aguènt parla ‘nsin, meteguè sus sis espalo uno marrido biasso touto traucado em’ uno courrejo recrouquihado. Eumiéu ié dounè lou bastoun que i’agradavo e partiguèron, leissant li chin garda li pouciéu emé li chouro. E Eumiéu menè ansin vers la vilo soun mèstre coume un paure vergougnous emé soun bastoun e tapa de miseràbli peio. 

   En anant pèr lou camin arèbre arribèron proche de la vilo e de la font di bèllis aigo mounte venien tira d’aigo li vilandrié. Itaque, Nerite e Poulitour l’avien bastido ; e tout alentour, i’avié ‘n bos sacra de piblo eigaliero, tout envirouna d’aigo ; e uno aigo frejo rajavo d’aut d’un roucas. I’avien dreissa dessus un autar di Ninfo ounte fasien de sacrifice tóuti li viajadou.

   Es aqui que Melànti, enfant de Doulìe, li rescountrè tóuti dous. Menavo li mai bèlli cabro de soun troupèu pèr lou repas de Calignaire, e dous pastre lou seguissien. Alor, en vesènt Ulisse e Eumiéu, ié cerquè garrouio e ié diguè de mot groussié e laid ; e l’amo d’Ulisse n’en fuguè esmougudo :

   — Veici qu’un marrit meno un autre marrit ! ansin un diéu douno un parié à-n-un semblable. Pourcatié pudènt, mounte aduses aquéu galavard, aquéu mau-fachous mendicaire, aquéu gasto-repas ; gausira sis espalo à s’apiela en tóuti li porto, demandant li soubro, e noun jamai li glàsi o li peiròu, douno dis oste. Se me lou dounaves ié fariéu garda mi jas e li curarié ; adurié l’apaiage i cabrit ; e de béure lou pichot-la, acò ié farié la cueisso grasso. Mai dèu sache faire que de marrido obro, e vòu pas rustica ; amo miés ana dins lou pople demanda pèr repaisse soun vèntre glout. Iéu te lou dise, e ço que dise se fara : se rintro dins lou palais dóu divin Ulisse, si costo se gausiran souto lis escabèu que lis ome ié mandaran à la tèsto.

   Aguènt parla ‘nsin, dóu foulige se rounsant sus d’èu, ié dounè ‘n cop de pèd à l’anco, sènso lou pousqué destourba dóu camin: mai éu restè tanca. Ulisse balancè de ié leva l’amo d’un cop de barro, o se l’aubourant de terro, i’escracharié pas la tèsto sus lou sòu. Mai se retenguè dins soun amo ; e lou pourcatié, aguènt vist acò s’enmaliguè e diguè en levant li man:

   — Ninfo fountaniero, fiho de Jupitèr, se jamai Ulisse a brula pèr vautre li garro grasso dis agnèu e di cabrit, fasès que moun vot se coumpligue ! Revenguèsse aquel ome, e qu’un diéu l’aduguèsse ! Alor, o Melànti, esparpaiarié aquelo supèrbi qu’espacejes sèns vergoungo, en barrulant pèr la vilo, dóu tèms que li n pèrdon si fedo.

    E lou cabraire Melànti ié rebequè :

   — O Diéu ! de que dis aquéu chin rusa ? Mai lou menarai lèu, iéu, sus d’uno barco negro, liuen d’Itaco, e n’en tirarai un bon pres. Basto, li Diéu ! Apoloun de l’arc d’argènt matèsse vuei Telemaque dins soun palais, o que lou giblèsson li Calignaire, coume es verai qu’Ulisse a perdu lou jour de la revengudo, apereilalin.

   Aguènt parla ‘nsin, li leissè marcha plan e li plan e li passè ; arribè lèu au palais dóu Rèi. E tant-lèu intrè e s’assetè entre li Calignaire, proche d’Eurimaque que l’amavo forço. E ié dounèron sa part di viando e la venerablo beilesso i’aduguè de pan.

   Alor Ulisse e lou brave pourcatié estènt arriba, s’arrestèron. Lou cant de la quitarro boumbudo i’arribè, car Fèmi coumençavo de canta au mitan di Calignaire. E Ulisse, prenènt la man dóu pourcatié, ié diguè :

   — Eumiéu, certo, veici li bèu palais d’Ulisse. Es eisa de li recounèisse entre tóuti, talamen dessèmblon lis autre ; la cour es facho d’uno muraio em’ uno garlando, e li porto à dous batènt soun soulido ; i’a pas d’ome que li pousquèsson assali. Coumprene que soun forço à-n-aquèu counvit, car lou fum di graisso n’en mounto ; e ressono la quitarro, que li Diéu faguèron la coumpagno di festin.

   E lou Pourcatié ié respoundeguè :

   — As coumprès eisa, car siès pas dessena. Mai veguèn ço que nous fau faire: s’intraras premié dins lou palais bèn prouvesi, e te grandiras vers li Calignaire, e iéu demourarai eici; vo bèn se vos resta, anarai proumié : mai te faudra gaire resta deforo, de pòu que te picon o te fagon parti. Decido-te.

   E lou paciènt e divin Ulisse ié respoundegué :

   — Coumprés, lou sabe. Farai avisadamen ço que me dises. Passo proumié, iéu demourarai eici. Siéu abitua i plago e moun amo es paciènto, car n’ai forço passa sus mar e dins la guerro. Arribara em’ éli ço que fau qu’arribe. Pode pas mai escoundre l’aulo fam de moun vèntre, que douno tant de mau is ome, e que fai armeja li barco à banc d’apès sus la mar esterlo pèr pourta la malamagno is enemi.

   Ansin se parlavon, e un chin que se radassavo aqui, levè la tèsto e dreissè l’auriho. Èro Argus, lou chin qu’Ulisse avié abari éu-meme, e que soun mèstre n’avié pas jouï, estènt parti pèr Ilioun. Li jouvènt dins lou tèms lou menavon cassa li cabro sóuvajo, li cèrvi e li lèbre dins li bos; e aro, lou mèstre parti, jasié, abandouna, sus lou femié di miòu emai di biòu qu’èro leissa ‘qui, davans li porto, e que lis esclau d’Ulisse venien pièi leva pèr endrudi lou bèn. Argus rebalavo aqui plen de lengasto. E subran, coume recouneissié Ulisse, remenè la co e beissè l’auriho ; mai pousquè pas mai s’avança vers soun mèstre ; e aquest en lou vesènt eissuguè ‘n plour, en s’escoundènt d’Eumiéu.

   E ié demandè :

   — Eumiéu, es uno meraviho aquéu chin que se radasso sus lou femié: soun cors es bèu ; sabe pas se fuguè bon courrèire, em’ aquéli formo, o s’es un d’aquéli chin que li ome an à sa taulo, e que li mèstre nourrisson pèr soun plesi.

   E lou pourcatié ié respoundeguè :

   — Es lou chin d’un ome qu’es mort liuen d’eici. S’avié la bèuta e lou biais coume quand Ulisse lou leissè en partent pèr Troio, sariés meraviha de soun courre e de sa forço. I’avié pas de bèsti fugissènt au founs di séuvo espesso que ié poudié ‘scapa ; e li couneissié i piado. Aro es aclapa de mau. Soun mèstre es mort liuen de la patrìo, e li servicialo inchaiènto lou sougnon pas. Lis esclau, quand li mèstre coumandon plus volon plus faire ço que se dèu, car Jupitèr que vèi liuen lèvo la mita dóu voulé à l’ome, lou jour que lou met dins l’esclavitudo.

   Aguènt parla ‘nsin, intrè dins lou bèu palais que travessè pèr ana vers li famous Calignaire. E la negro Mort prenguè Argus lou moumen que revesié Ulisse après vint an.

   Telemaque veguè lou proumié Eumiéu travessa l’oustau e ié faguè ‘n signe que venguèsse lèu. E lou Pourcatié, l’aguènt vist, prenguè lou sèti dóu Porto-car que servissié li viando en abounde i Calignaire e li partissié entre li counvida. Eumiéu pourtè lou seti davans la taulo de Telemaque e s’assetè. E ‘n precoun ié pourgiguè uno part di mèisse e dóu pan dóu canestèu.

   Gaire après d’éu Ulisse intrè dins l’oustau, coume un vièi e miserable mendicant sus soun bastoun e tapa de láidi peio. E s’assetè sus lou lindau de frai, en dedins di porto, e s’apiejè sus li post de ciprès qu’un fustié avié dins lou tèms abilamen lisado e dreissado d’escaire. Alor Telemaque, aguènt parla au pourcatié, prenguè ‘n pan entié dins la bello canestello, e de viando tant que si man n’en poudien teni; e ié diguè :

   — Porto acò, e douno-lou à l’Estrangié ; e digo-ié que demande en tóuti li Calignaire. La vergougno vau rèn au paure.

   Ansin parlé, e lou pourcatié l’aguènt entendu, s’aflatè d’Ulisse e ié diguè aquéli paraulo aludo : 

     — Telemaque, o Estrangié, te semound acò e te fai dire de demanda en cadun di Calignaire. E dis que la vergougno vau rèn au paure.

   E l’avisa Ulisse ié respoundeguè :

   — Rèi Jupitèr ! Fai que Telemaque siegue urous entre lis ome, e que se coumpligue tout ço que dins soun èime desiro.

   Ansin parlè, e prenènt di dos man, pausè lou viéure davans si pèd sus l’ordo biasso ; e manjavo dóu tèms que cantavo lou Chantre dins la salo. Mai lou Chantre divin se taisè e li Calignaire faguèron un grand sagan, e Minervo s’aflatant d’Ulisse, l’acouragè que demandèsse i Calignaire, pèr cou-nèisse quau èron li bon e quau li marrit. Mai pas un se devié escapa de la mort. Ulisse se despachè de demanda en cadun, en coumencant à drecho e en pourgissènt li dos man, coume fan li paure. E éli ié dounavon, n’aguènt pieta, e s’estounavon, e se demandavon quau èro e de mounte venié. Alor lou cabraire Melànti ié diguè :

   — Escoutas-me, Calignaire de la Rèino preclaro, vous parlarai d’aquel estrangié qu’ai deja rescountra. De segur es aquéu que lou pourcatié a mena eici; mai sabe pas sa raço.

   Ansin parlè, e Artinòu charpè lou Pourcatié en ié disènt :

   — Pourcatié famous perqué as mena ‘quel ome à la vilo ? N’avèn pas proun de lànfri e d’àutri mendicaire menèbre, gasto-repas ? Atroves dounc pas marrit qu’aquéli que soun eici acampa devourigon lou bèn dóu mèstre, e nous aduses encaro aquéu ?

   E lou pourcatié Eumiéu ié respoundeguè :

  — Antinòu, dises pas de bòni resoun, emai siegues abile. Quau fai veni un estrangié que noun siegue ome biaissu, devinaire, mège, fustié, chantre ispira di diéu, que l’on se chalo de l’ausi ? Aquéli, lis ome li fan veni à travers la terro inmènso. Mai un paure, degun lou sounarié, pèr se lou reproucha pièi. Siés, tu, lou mai dur di Calignaire pèr li servidou d’Ulisse, e pèr iéu subretout. Mai me n’en fau pas soucit, tant que la prudènto Penelopo e Telemaque viéuran dins lou palais.